ວັດຫຼວງຈຽງໄຈ ເມືອງສິງ ແຂວງ ຫຼວງນໍ້າທາ

ວັດຫຼວງຈຽງໄຈ ເມືອງສິງ ແມ່ນຕັ້ງຢູ່ບ້ານ ຊຽງໄຈ ເມືອງສິງ ຫຼັງຫໍພິພິຕະພັນ ເມືອງສິງ ເຊິ່ງເປັນວັດຫຼວງ ທີ່ຕັ້ງ ຢູ່ໃຈກາງເມືອງ, ເປັນວັດເຄົ້າເມືອງ ມີເນື້ອທີ່ວັດທີ່ກ້ວາງ 

 

 

 

 

ວັດຫຼວງຈຽງໄຈ ແມ່ນວັດເກົ່າແກ່ ເປັນວັດເຄົ້າເມືອງ ຂອງເມືອງສິງ ເປັນສູນລວມທາງ ດ້ານວັດທະນະທຳຄວາມເຊື່ອ ຂອງຊາວບ້ານຊຽງໄຈ ແລະ ຊາວເມືອງສິງ, ເປັນທີ່ເພິ່ງທາງດ້ານຈິດໃຈ ຂອງຊາວບ້ານຊາວເມືອງ ຕາມປະວັດເມືອງສິງ ກ່າວວ່າ: ພາຍຫຼັງເຈົ້າຟ້າສິຫຼິໜໍ່ຄຳ ໄດ້ສ້າງເມືອງສິງສຳເລັດ ໃນປີ ຄສ 1873. ຢູ່ໃນວຽງ 4 ດ້ານຄື: ບ້ານຊຽງໃຈ, ບ້ານຊຽງອິນ, ບ້ານຊຽງຍືນ ແລະ ບ້ານຊຽງແລ ໃນຈຳນວນບ້ານເຫຼົ່ານີ້ ແມ່ນຍັງບໍ່ທັນມີວັດໄວ້ສັກກະລະບູຊາເທື່ອ ບໍ່ພຽງແຕ່ປຸກອາຮາມນ້ອຍໆ ຊົ່ວຄາວໄວ້ຊື່ໆ.

 

 

 ມາໃນເດືອນ 6 ຄສ 1873 ເຈົ້າຟ້າສິຫຼິ ໜໍ່ຄຳ ໄດ້ເອົາຕົ້ນໂພ ຈຳນວນ 7 ຕົ້ນ ປູກອ້ອມຮົ້ວວັດ (ບໍລິເວນວັດຫຼວງຈຽງໄຈ ໃນປະຈຸບັນ) ແລະ ເພິ່ນໄດ້ອະທິຖານວ່າ "ສະຖານທີ່ແຫ່ງນີ້ ຖ້າຫາກວ່າເໝາະສົມ ທີ່ຈະສ້າງວັດ ເພື່ອຄວາມຮຸ່ງເຮືອງ ໄປພາຍພາກໜ້າ ຂໍໃຫ້ຕົ້ນໂພ 7 ຕົ້ນນີ້ບໍ່ໃຫ້ຕາຍຈັກຕົ້ນ ໃຫ້ອອກໜໍ່ ອອກໃບ ຂຶ້ນສວຍງາມ" ຈາກນັ້ນ ເພິ່ນກໍ່ໄດ້ປູກຕົ້ນໂພ ລົງດິນ, ມາເຖິງເດືອນ 2 ປີ ຄສ 1874; ເຈົ້າຟ້າພ້ອມດ້ວຍເສນາອາມາດ ໄດ້ພາກັນ ໄປກວດກາເບິ່ງຕົ້ນໂພ 7 ຕົ້ນ ທີ່ປູກໄວ້ ແລະ ກໍ່ປະກົດວ່າບໍ່ຕາຍຈັກຕົ້ນ, ແຕ່ລະຕົ້ນ ກໍ່ປົ່ງໜໍ່ຈໍ່ໃບ, ນັ້ນ ສະແດງວ່າ ສະຖານທີ່ແຫ່ງນີ້ ສາມາດ ປຸກສ້າງວັດໄດ້ ຈາກນັ້ນ ເຈົ້າຟ້າ ກໍ່ໄດ້ນຳພາຣາຊະດອນ ປຸກສ້າງວັດຂຶ້ນ ໂດຍເຈົ້າຟ້າ ເປັນຜູ້ອອກແບບວັດ ດ້ວຍຕົວເພິ່ນເອງ ແລະ ປະຈຸບັນນີ້ ຮູບຮ່າງລັກສະນະ ຂອງວັດ, ພຣະພຸດທະເຈົ້າຫຼວງ (ພຣະປະທານພຣະເຈົ້າໃຫຍ່), ຮູບປັ້ນ, ຮູບຄວັດຊ້າງ ທີ່ເຈົ້າຟ້າ ລົງມືເຮັດເອງ.

ຮູບພາບໂດຍ : ພຣະອາຈານ ບຸນທະວີ ກົມພະພັນ