ຣາຊຣົຖສຸວັນນະຫົງ
ເຄື່ອນຂະບວນມາຮອດພຣະທາຕຸຫລວງແລ້ວ
ວັນທີ 21/06/2020 ໄດ້ມີການເຄື່ອນຍ້ານຣາຊຣົຖສຸວັນນະຫົງ ( ຫົງຄຳ )
ຈາກສວນພູໄທທີຣະ ບ້ານຫນອງແປນເຫນືອ ເມືອງຫາດຊາຍຟອງ ນະຄອນຫລວງວຽງຈັນ
ມາຕາມເສັ້ນທາງ 450 ປີ ໃນເວລາ 14:00 ໂມງ
ກໍ່ໄດ້ມາຮອດລານເດິ່ນພຣະທາຕຸຫລວງເມື່ອເວລາ 16:00 ໂມງ
ຣາຊຣົຖຄັນນີ້ແມ່ນສ້າງຂຶ້ນໂດຍເຈົ້າມູນລະສັດທາແລະການອອກແບບ-ຊີ້ນຳ ນຳພາສ້າງໂດຍ
ທ່ານສີສະຫວາດ ທີຣະວົງ ປະທານທີ່ປຶກສາ ສວນພຸໄທທີຣະ
ເພື່ອເປັນຍານພາຫະນະບັນຈຸພຣະໂກສະຍານ (ໂກດ) ຂອງສະຣິຣະສັງຂານຂອງອົງພຣະຍອດແກ້ວ
ມະຫາສັງຄະສຸທັມມາທິບໍດີ ມະຫາງອນ ດຳຣົງບຸນ ມະຫາເຖຣະເຈົ້າ
ຣັດຕະນະມະຫາສັງຄະປາໂມກ ທີຈະມີພິທີຖວາຍພຣະເພິງ ໃນວັນທີ 26/06/2020
ທີລານເດິ່ນພຣະທາຕຸຫລວງ
ການສ້າງຍານພາຫະນະເພື່ອບັນຈຸສະຣິຣະສັງຂານ ຂອງພຣະສົງ ,ເຈົ້າມະຫາຊິວິດ
ຫລືຜູ້ສູງສັກ ຜູ້ທີເຄົາຣົບສູງສຸດ ໃນອະດິດຂອງເມືອງລາວເຮົາ
ມັກນິຍົມສ້າງເປັນສັດໃນປ່າຫິມະພານ ຕາມຄວາມເຊື່ອເລື້ອງໄຕພູມ
ຂອງຄະຕິທາງສາສະໜາພຸດແລະອິນດູ ທີມີຄວາມເຊື່ອວ່າ
ປ່າຫິມະພານຕັ້ງຢູ່ເທີງພູພຣະສຸເມຣຸ ປ່າຫິມະພານ ມີເນື້ອນທີ ປະມານ 3,000 ໂຍດ (
1 ໂຍດ = 16ກິໂລແມັດ) ມີຣັດສະໝີວົງກົມ 9,000 ໂຍດ ແລະມີຍອດເຖິງ 84,000 ຍອດ
ໃນປະເທດລາວເຮົາໃນອະດິດ ເຄີຍນຳເອົາສັດປ່າຫິມະພານມາສ້າງເປັນຍານພາຫະນ
ແມ່ນນິຍົມກັນສ້າງເປັນຍານພາຫະນະດັ່ງປາກົດໃຫ້ເຫັນເຊິ່ງປະກອບມີ : ນາກ,
ນົກຫັດສະດິນ (ຫັດສະດິລິງ) , ແລະຫົງ ເປັນຕົ້ນ
ເພາະບັນດາຍານພາຫະນະທີເປັນສັດປ່າຫິມະພານເຫລົ່ານີ້
ແມ່ນຈະພາດວງວິນຍານຂອງຜູ້ຫມົດບຸນບິນໄປສູ່ແດນສຸຂະຕິພົບ.
ຫົງ ເປັນສັດປ່າຫິມະພານ ຕາມຄວາມເຊື່ອຂອງໄຕພູມ
ແມ່ນເວົ້າເຖິງຖິ່ນອາໄສຢູ່ກາງປ່າຫິມມະພານ ມີຈຳນວນເຖິງ 9 ໝື່ນຕົວ
ແລະມີພຣະຍາສຸວັນນະຫົງ (ຫົງຄຳ) ເປັນຫົວຫນ້າ ເພາະຫົງຖືວ່າເປັນສັດໃນຕະກຸນສູງ
ມີຮູບຮ່າງງົດງາມ ທັງຢືນ ທັງບິນແມ່ນມີຄວາມອ່ອນຊ້ອຍ
ແລະມີສຳນຽງສຽງຮ້ອງທີມ່ວນອອນຊອນນຳອີກດ້ວຍ
ໄຕພູມ ຫລືໄຕໂລກ ແປວ່າ ສາມໂລກ ເຊິ່ງເປັນຄະຕິ ທີກ່ຽວກັບໂລກສັນຖານ
ຕາມຄວາມເຊື່ອໃນສາສະໜາອິນດູ ແລະສາສະໜາພຸທ ເຊິ່ງໄຕພູມແມ່ນປະກອບດ້ວຍ :
ກາມມະພູມ , ຮູບປະພູມ ແລະ ອະຮູບປະພູມ ສັດໂລກທັງຫລາຍກໍ່ຈະວົນວຽນເກີດ-ຕາຍ
ໃນໄຕພູມແຫ່ງນີ້ ຈົນກວ່າຈະສຳເຣັດເຊິ່ງພຣະອະຣະຫັນຕ໌ເຈົ້າ ນັນແລ.
ເປັນຫຍັງ ສຸວັນນະຫົງຈຶ່ງຄາບຍອຍຂົນຈາມມະຣີ
ຕາມຄະຕິຄວາມເຊືອຂອງຂົນຈາມມະຣີ ແມ່ນຈະແມ່ນເຄື່ອງປະດັບໃນຣາຊພິທີຕ່າງໆເຊັ່ນ :
ເປັນຫນຶ່ງໃນຫ້າຢ່າງ ທີເຈົ້າມະຫາຊີວິດຈະຂຶ້ນຄອງຣາຊຕ້ອງມີເຄື່ອງສົມໂພດ
ຫນຶ່ງໃນນັ້ນກໍ່ມີແສ້ຂົນຈາມມະຣີ ປະກອບນຳດ້ວຍ, ຊ້າງເຜືອກທີມີພິທີແຫ່
ກໍ່ຕ້ອງນຳໃຊ້ຍອຍທີເປັນຂົນຈາມມະຣີປະດັບໄວ້ທີກ້ອງຫູ , ຫົງແບບຕ່າງໆ
ກໍ່ຕ້ອງມີການຄາບຍອຍຂອງຂົນຈາມມະຣີ , ເຮືອຊ່ວງໂດຍສະເພາະຢູ່ຫລວງພຣະບາງ
ກໍຕ້ອງມີຍອຍເຮືອທັງ 2 ແຫງ່ມເຮືອດ້ວຍ
ຄວາມເຊື່ອຂອງການນຳໃຊ້ຍອຍຂອງຂົນຈາມມະຣີສະຫລຸບຫຍໍ້ໆ ກໍ່ຄື
ປັດເປົ່າສິ່ງທີເປັນອະປະມຸງຄຸນ ( ສິ່ງບໍ່ດີ ) ທັງຫລາຍໃຫ້ຫນີອອກໄກຫ່າງ
ດ່ັງນີ້ແລ.
ຮີບໂຮມເນື່ອໃນຂໍ້ມູນແລະຮູບພາບໂດຍ : ຄັງ-ສາງ kung-sang
ความคิดเห็น
แสดงความคิดเห็น